Catutuo latgalīšu volūdys i kulturys škola

Zīmys škola ir unikals pasuokumu kūpums, kura gaitā 19. godu symta beiguos iz Sibiri izceļojušū latgalīšu piectečim i citim interesentim teik dūta īspieja vuiceitīs latgalīšu volūdu, latgalīšu dančus, dzīsmis i dazynuot vaira par Latgolu i Latveju.

Nūrisis vīta, kai ari i cytus godus, ir Krasnojarskys nūvoda piļsāta Ačynskys, kur Ačynska Pedagogiskuos koledžys telpuos teik radeita latgaliska nūskaņa. Vuiceibys Zīmys školā teik organizeitys divom grupom — vīnu grupu apmeklej tī, kuri latgaliski runoj i skaita, ūtrā — jaunīši no koledžys i citi interesenti, kas teik īpazeistynuoti ar latgalīšu volūdu gon nu gramatikys, gon nu citym filologiskim aspektim. Nūdarbeibys jaunuokajai grupai vadeja LgSC bīdris Muora Mortuzāne i Eta Nikolajeva, vacuokajai grupai — LgSC bīdre Kristīne Zute i Solveta Logina.

Projektu realizeja LgSC sadarbeibā ar LU Filologejis i muokslys zynuotņu fakultati, finansiejumu catūrtuos Zīmys školys nūrisei pīškeire Latvejis Kulturkapitala fonds.

Vīna nu naparostuokajuom Zīmys školys i cytu Sibira ekspediceju īzeimem — sadarbeiba ar Romys katuoļu bazneicu. Ari itymā godā ekspedicejis daleibnīku pulkā ir Preiļu rajona Pīneņu i Znūteņu draudžu prāvests Aigars Bernāns, kurš kūpā ar vītejim katuoļu prīsterim apmekleja attuoluokuos dzeraunēs dzeivojūšus latgalīšus i vadeja Misis Ačynska katuoļu bazneicā.

Nūdarbeibu nūrisis forma ir daudzveideiga — dorba dīnuos nūteik seminari obom Zīmys školys škoļnīku grupom, piec kurom ir kūpeiga vokora nūdarbeiba ar dzīsmem, dančim i rūtaļom. Vokora nūdarbeibu laikā jaunajai paaudzei ir īspieja satikt vacūs ļauds, dzierdēt latgalīšu volūdu nu pošim Sibira latgalīšim i pošim praksī izmieginuot dažaidys praktiskys latgalīšu kulturys paruodeibys.

Breivdīnuos profesore Lidija Leikuma laseja lekcejis par dažaidom ar Latgolu i latgalīšu volūdu saisteitom temom. Ituos lekcejis tyka laseitys krīviski, lai byutu pīejamys plašuokam interesentu lūkam.

Atškireibā nu cytom Zīmys školom itymā godā tyka atvārtys divys filialis — Mozuos zīmys školys Boļšeulujā i Bičkūs — kotrā vītā treis dīnys losūt lekcejis interesentim i teikūtīs ar vītejim latgalīšim, kurim nav īspiejis nūbraukt da Ačynskam iz Zīmys školu.
Zīmys školys nas arī zynomus augļus — vītejim latgalīšim teik styprynuota nacionaluos kūpeibys izjiuta i calta pašapziņa, paruodūt, ka arī jūs senču kultura i volūda ir nūzeimeiga i saglobuošonys vārta. Taipat teik īvuokts boguoteigs volūdys materials, kas vāluok teik izmontuots dažaidūs LU FF pietnīciskajūs dorbūs.